fbpx

【獨家】曾志豪—問題天天都多同深奧

自從曾小B識講嘢,佢就充份繼承小弟嘅伶牙俐齒,再配合細路獨有嘅創意思維,問咗一個又一個的,兒童版《天問》。

首先,他對「誰比較厲害」非常好奇。當他第一次認識恐龍世界,他便捉住媽媽不停發問。「媽媽,暴龍勁啲,定係雷龍勁啲㗎?」「吓?暴龍啩。」(心諗,雷龍係咩樣都唔知。)「咁腫頭龍犀利啲,定三角龍犀利啲?速龍犀利啲?定係霸王龍啊?」

你以為這個是極限嗎?太天真了,曾小B過了一個星期,開發出更深奧的問題,只有兩個字,但威力無窮,難以招架。

案件重演。「媽媽,暴龍犀利啲定三角龍犀利啲?」「暴龍。」「點解?」看倌,就是這兩個字──點解──WHY?

簡單兩個字,簡直要了你的命!我們如何能夠知道,「點解」暴龍係犀利過三角龍呢?很快曾小B便需要更詳細的答案滿足成長的好奇,「點解點解」,真係why why tell me why。

後來他轉為喜歡漫威超級英雄系列,於是便不停問「雷神犀利啲定綠巨人?點解?」我們惟有自創答案。「因為雷神有個鎚仔會揼綠巨人隻腳指會痛囉……」

第二階段,他喜歡問「甚麼東西怕甚麼東西」。案件又重演。「爸爸,超人驚乜嘢㗎?」第一次聽我真是驚一驚,超人驚乜嘢?你為甚麼會覺得超人也有「驚」的時候?即是,洞察了英雄也有弱點。OK,我諗多咗,佢可能只是很想知道「超人驚乜嘢」。

有些問題的確有正確答案。「超人驚氪星石。」「點解啊?」「因為佢一掂到就會無晒能量。」但很快,曾小B的問題超越了我們的答案。譬如他喜歡《西遊記》,便會問:「孫悟空驚乜嘢」?「驚唐僧。」「點解啊?」「唐僧會唸緊箍咒。」「點解啊?」「咁孫悟空個頭會痛囉。」「咁唐僧驚乜嘢啊?」「驚妖怪囉。」「點解?」「妖怪會食佢囉。」「如來佛祖驚乜嘢?」吓!佛祖都要驚?呢個真係考起!如來佛祖好似無嘢要驚喎。

後來我心生一計。「如來佛祖驚乜嘢啊?爸爸。」「驚啲人唔信佢囉。」「點解啊?」「如果啲人唔信佢,咁如來佛祖就唔靈㗎啦。」宗教最怕就是沒有信仰,我這個爸爸被兒童版《天問》激發出最強小宇宙。

「爸爸,忍者龜驚乜嘢啊?」「無pizza食囉。」「唔係啊,係驚老鼠老師啊。」「係喎!」「咁老鼠老師驚乜嘢啊?」「唔……你話呢?」「梗係驚貓啦!」兒童的創意完勝爸爸。

下次我會反問:「阿仔,爸爸驚乜啊?咪就驚你問問題囉。」

 


作者:曾志豪,電台上的瘋show快活人.電視上的頭條小豪子.育有一毛孩二屁孩.育兒信念:毋忘初衷,勿做怪獸.育兒絕技:自創兒童故事。

  • Facebook Error: Please check the details entered.
  • Follow609Followers
  • YouTube Error: Please check the details entered.

Zeen is a next generation WordPress theme. It’s powerful, beautifully designed and comes with everything you need to engage your visitors and increase conversions.