fbpx

【獨家】曾志豪—如何用《獅子王》教孩子不講大話

題目好深,但其實是日常生活基本都會遇到的問題。

大仔愈來愈好動,愈來愈喜歡對細仔動手動腳。老婆目擊,大仔經常搞細佬後面,從後推跌。細佬哭得嘩嘩大叫,大佬一臉無辜,老婆問:「你推跌細佬?」大佬:「唔係,細佬自己跌低架。」老婆氣結。

老婆又目擊,大仔玩水樽結果成樽水飛濺濕身。老婆又問:「做乜玩水?」大仔:「唔係啊,啲水唔知點解自己飛咗出嚟。」

老婆又又目擊……大仔又又賴皮……最後我遭殃。「個仔似足你!成日講借口賴皮唔認錯!」唉,躺著也中著。

心理學家認為,即使是一隻黑猩猩做錯事,也會條件反射怪罪他人。千真萬確,自己搵出處。我無呃你。所以我知道阿仔此舉也是天生反應,但,錯就係錯,講大話賴人就係講大話賴人,點算?

老婆高壓軟功,雙管齊下,連《狼來了》的故事都講過幾次,但大仔無反應。還是我想到「與時並進」的法子,《狼來了》太久遠,應該講《獅子王》。鄧明儀Elaine也講過《獅子王》的故事,但她比較深層,探討了「不要忘記自己的身份」;我個仔太細,我用了最淺的道理「唔好講大話」。

還記得這一幕嗎?「奸個隻獅子(阿仔:刀疤)推了忠個隻獅子(阿仔:唔記得個名)落山崖,獅子仔(阿仔:辛巴)喊到豬頭,但奸個隻獅子竟然講大話,唔認自己推佢落去,仲扮關心辛巴,叫佢快啲離開。你話,刀疤係咪好唔啱?係咪講大話?仲要怪係獅子爸爸自己跌咗落山崖,係咪好壞?」阿仔不停點頭。我馬上判案:「所以呢,你如果推跌細佬,你唔認,你咪變咗刀疤囉。咁你咪係壞蛋,你要唔要做刀疤?」阿仔搖頭。

我暗喜。老婆適時加了一句:「媽媽問你,刀疤係咪以為自己講大話無人會知啊?但最後係咪都俾辛巴識穿咗啊?所以呢,講大話,最後一定會俾人知㗎,你明唔明啊?」厲害我的媽!這個結論比起《狼來了》更深刻,講大話的人以為可以騙所有人,但最後一定會識穿!

阿仔有何改變?幾日後,他告訴我:「爸爸,我今日倒瀉咗水喺地下,我即刻同媽媽認係我做架,我無講大話啦!」感動!他終於改變了!

等等……他好像覺得倒瀉水很值得炫耀似的……喂阿仔,誠實還誠實,最重要,下次唔好倒瀉水啊!

 


作者:曾志豪,電台上的瘋show快活人.電視上的頭條小豪子.育有一毛孩二屁孩.育兒信念:毋忘初衷,勿做怪獸.育兒絕技:自創兒童故事。

  • Facebook Error: Please check the details entered.
  • Follow385Followers
  • YouTube Error: Please check the details entered.

Zeen is a next generation WordPress theme. It’s powerful, beautifully designed and comes with everything you need to engage your visitors and increase conversions.