fbpx

【獨家】曾志豪—爸爸我有個秘密話你知

五歲的兒子有一天很神秘的和我說:「爸爸,我有一個秘密。」「係咩?講嚟聽吓。」「唔得,呢個係秘密,唔可以講。」

各位,如果你少了一份機警,便失去了一個了解孩子的機會,或者,便無法避免一個錯誤。當時我豎起耳朵,高度戒備,因為小朋友的秘密,有時會透露重要訊息。「阿B,同爸爸唔可以有秘密㗎喎,要講俾我聽。」

曾小B畢竟太年輕,他相信了,他屈服了。他悄悄在我耳邊說:「今日學校陳大文叫我攞咗個玩具啊。」我不解:「咩玩具?」他解釋:「擺係學校走廊嘅玩具啊。」

我知道是甚麼一回事。學校有聖誕展覽,甚麼馬槽、伯利恒等等,有些布置用了玩具人仔裝飾,而這些玩具人仔,是屬於學校的財物。換言之,有個同學仔叫我個仔攞走學校既財物。即是,偷嘢。

我知我知,幼稚園的小朋友不懂甚麼叫偷,應該只是貪玩,想拎走玩具;但用大人的角度,這的確就是「偷」的行為,一定要阻止。而且,大家最害怕便是「小時偷針、大時偷金」,如果不儘快「止偷制貪」,後果嚴重。

我想了一想,先不責罵,反而用更溫和的聲線詢問:「阿B,咁你有無攞到個玩具?」「無啊,但我好想攞,因為屋企都無呢個玩具。」

我鬆一口氣,至少未犯案。「阿B啊,呢個玩具其實係學校嘅,你唔可以攞㗎。」「點解?我好想玩啊。」「如果你攞走咗,其他同學仲會唔會有得玩呢個玩具?」「無,因為我已經攞走咗。」「所以你唔可以攞㗎,同埋,你咁樣攞走人哋架野仲要無問人,知唔知叫咩行為啊?」「咩啊?」「係偷啊,你做咗小偷㗎啦。」

他有點愕然。我再下一城:「阿B,偷嘢唔啱㗎。你知唔知,爸爸細個都試過偷嘢,結果俾爺爺好嬲咁鬧咗爸爸。」他無法想像爸爸試過偷嘢,而一向和順可親的爺爺,居然會發惡罵人。

我把小學的一段往事向他交待:「小學同學叫爸爸同佢一齊去文具店偷鉛芯筆,我仲好開心拎返屋企。點知爺爺知道即時發嬲,仲一手拗斷咗枝鉛芯筆,用張紙巾包住,叫我還返俾嗰個同學,話唔可以偷嘢。爸爸之後唔敢再做呢啲事啦。」我講得仔細,小B聽得認真,眼都不眨一下。這個故事看來打動了他,他非常堅定的告訴我,一定不會拿走學校的玩具。他不要做小偷。

這應該是爺爸兒三代經驗connect的難得體驗,比起單純講大道理,更易入腦。這也算是另類的「以身作則」。

後遺症是,小B逢人便講一次「我爸爸細個偷嘢俾爺爺罰」……咳咳,阿仔,你在唱衰爸爸囉。

 


作者:曾志豪,電台上的瘋show快活人.電視上的頭條小豪子.育有一毛孩二屁孩.育兒信念:毋忘初衷,勿做怪獸.育兒絕技:自創兒童故事。

  • Facebook Error: Please check the details entered.
  • Follow588Followers
  • YouTube Error: Please check the details entered.

Zeen is a next generation WordPress theme. It’s powerful, beautifully designed and comes with everything you need to engage your visitors and increase conversions.