fbpx

【Blogger轉載】全職家庭主婦考牌成功

全職家庭主婦,絕對是一門專業。由晨早五、六點做到深夜十點、十一點,在一天之內分身角色變變變,還要趕幾十條deadlines。這些「主婦之日常」,咁都handle到的,不是有強勁的工作能力,就是有過人的堅毅意志。

回顧工人姨姨放假的這兩個月,我的生活忙了,得著卻比我想像中多:

●最大的挑戰係在狂風暴雨中帶住兩個小朋友去街市買餸(成功挑戰兩隻手又拖小朋友過馬路、又擔遮,又拎餸✌??);

●最辛勞的家務係換床單。須知在一間夾硬放三張床的房間內要換床單已經寸步難移,仲要將隻手攝入去床與床之間的罅隙才能托起張笨重嘅床褥攝張床單入去。加上個貪玩的佬寶寶總要在此時跳上床上玩「瀡滑梯」,難度再提升十級。但我咁都仲堅持到每星期咁換,我要自我嘉許一下??;

●生活每天都很充實,覺得自己做咗好多嘢;

●我自覺自己好勤力,我無因為過累而唔煮飯/早餐而出街食,也堅持到每日去街市買新鮮嘅餸菜,仲一星期煲到兩三日湯;

●在家「重獲自由」,終於可在家中客廳開營火會大唱營火歌;夜晚竟然仲可以坐低飲杯茶同關生傾下偈,了解自己更多,簡直係自我大發現;

●廚房終於屬於返我同兩個小朋友。妹妹子同佬寶寶不停給我新「煮意」,我也因此而烹調了許多第一次嘗試的餸菜;

●家裏的運作比我想像中好。我依然可以打掃執屋買餸煮到一日三餐畀所有人,再加洗衫曬衫燙衫同日常嘅接送返放學;

●我看得到自己的進步——由第一日只可做好所有家務完全忽略佬寶寶,到第二、三日每日改進一點,到第四日我終於擠得出15分鐘帶佬寶寶去公園玩。這種進步令我自我感覺良好(雖然呢兩個月,我都係只帶到佬寶寶去四、五次公園);

●妹妹子非常生性,完全不用我陪她做功課,甚至提議我騰出時間做家務。自己做完功課執好書包仲幫我摺衫同煮飯,抵錫;

●佬寶寶日日幫我吸塵抹地同煮飯㷛湯。當同佢同齡嘅小朋友上緊N班/playgroups/興趣班時,我覺得自己好似同佢上緊小暖男訓練班咁;

●兩姊弟因我忙著做家務而多了機會自己兩個相處,感情大增;

●我跳出咗生活常規,有一朝帶完妹妹子返學,就走咗去同佬寶寶搭船去紅磡跑步。跑完條海濱長廊先返屋企煮飯。(雖然間中放過自己每日訂畀自己要追趕的schedule同timeline,個人係會輕鬆咗一晝的。不過一返到屋企見到個未清潔+滿佈塵埃的地下,又驚喺妹妹子放學前煮唔切飯,嗰種壓力真係……);

●第一次殺曱甴?;

●第一次殺蜘蛛??‍♀️……

自小的教育是自己的事自己做、盡自己本份做好、不假外求、無乜事就唔好煩人。媽媽對我自小訓練的「快、靚、正」家務技能,今次真係大派用場。

由轉職主婦兩年半以來,都有人話過我唔識湊、湊唔掂、做唔好、請咗工人都唔識用……人愈大,愈明白人哋點講點睇你,真係控制唔到,亦毋須放在心上。自己知道自己係點,自己重視的人明白自己,就已經足夠了。

聘用工人唔代表乜都畀人做曬先係叻,無咗工人依然唔會畀人撬起隻腳、唔使老公特登請假、唔會打攪到其他人原有的生活方式,我覺得咁仲緊要,亦證明畀自己睇自己有嘅能力。起碼呢兩個月,我過得很好,家裏的清潔程度同煮食衛生情況,我甚至覺得好過有工人呢!唯一係少咗時間陪兩個小朋友玩/同家人相處,同埋真係無時間溫書、寫稿同好難準時返到學囉。

媽媽說,呢兩個月係考我牌。她說我兩個月來都無求救過,算係咁。連媽媽都話算係咁,我當自己合格㗎啦!

感謝呢兩個月關心過我嘅人,無論係口頭上offer help定同我喺僅有嘅時間傾過偈甚至食過飯,都多謝你哋對我精神上嘅支持。我考牌成功啦!

 


作者:Candy Kwok,半途出家的細細粒全職媽媽,前報章專欄作家及公關。現全職照顧兩名小不點,陪他們經歷、長大。相信萬物有情、人間有愛,幸福往往就在平凡細節中。
facebook: Candy Kwok

 

  • Facebook Error: Please check the details entered.
  • Follow609Followers
  • YouTube Error: Please check the details entered.

Zeen is a next generation WordPress theme. It’s powerful, beautifully designed and comes with everything you need to engage your visitors and increase conversions.