fbpx

張頴康麥雅緻福岡5天遊 浸溫泉玩樂園一網打盡

今星期一連幾日,同大家分享返暑假後,我地去咗🇯🇵日本福岡玩⋯⋯原來福岡個機場好近市中心,從機場出發去天神附近,大約15至20分鐘左右。

香港飛福岡:約3小時15分✈️✈️✈️

當日10:30am 機出發⋯⋯佢哋幾開心!

Day 1) 到埗租車住apartment

去到機場就坐shuttle去租車公司🚘🚘喺福岡揸車好方便,多停車位,有嬰幼兒👶🏼真係租車方便,記得租埋car seat )不過租車公司搞手續攞車較耐⋯⋯🤨
之後去天神市中心壽司dinner 🍣,跟旅遊書介紹,不過只係覺得一般。 反而喺天神地下街食返個🥧bake cheese tart 做甜品即滿足晒!
兩晚住大倉洒店(不過感覺有啲舊,而且唔算平呀HK$1xxx一晚 /淡季)大倉酒店就喺麵包超人館旁邊,不過我哋今次都係無去),而之後幾晚住apartment式公寓(平均HK$5xx/晚)好乾淨好有驚喜😲😊

🏬公寓apartment 入住篇:
博多天神2號粋旅住宅酒店(英文: Ikidane residential hotel hakata tenjin 2)
優點: 好新好乾淨,直情成間屋咁設備齊全,我訂個晚HK$400咋!🤩🤩一張雙人床一張日式榻榻米⋯ 2大2小夠住!呢間有電梯的(見過有人分享話住apartment冇電梯要自己搬行李上幾層😱🥵

小缺點就係:1) check-in要自己搞掂(跟email 指示)2) 要早check out ,10am就要check out!3)樓下停車位有可能滿,可嘗試早點email 預留(不過附近都有停車場)

🗣🗣🗣差啲唔記得咗仲有一點大家必定要留意: 呢類公寓式apartment check-in time比較遲,5pm先可check-in,我覺得真係比較適合自駕遊,因為啲行李可以留喺車內,或者連續入住起碼2天,咁就唔使搬來搬去!

開餐了⋯⋯去食壽司,小朋友可以揀嘅選擇唔多,可以簡單叫蒸蛋、湯、煎三文魚頭、雞肉串等等⋯⋯不過的確係唔夠蔬菜⋯⋯所以每次去旅行我都有帶青汁啫喱去補充纖維。
趕得切9:00pm之前去食bake cheese tart!
家姐表示好滿意呀!

**********************************************************************************************************

Day 2)  香椎花園—森林家族樂園

入場費:大人¥1,100、小童(3歲以上)¥700(3歲以下免費)
網址參考:www.nnr.co.jp/kashiikaen/(日文)

入場後,首先會見到好多小型嘅機動遊戲🎪🎠(小火車、升空小飛象、小型過山車等等)🎡🎢有一啲係投幣方式,大部分是要買代幣,印象中每坐一次每一位¥300(大小同價)🤑我帶兩個小朋友坐一round已經係¥900(即約$63港幣)所以我建議,如果打算玩好多機動遊戲嘅話,就最好買佢個手帶無限次任坐(手帶好似係¥2xxx) 我哋去當日突然下大雨,所以冇買手帶!
個園區好大,行過咗一條森林隧道,就正式進入森林家族公園。 🐰🐶好多影相位,幼兒及小朋友都適合⋯⋯美中不足係入面好多設施(例如:想入森林家族間屋)都要單一收入場費。
入到盡頭有個巨型室內遊玩區(有波波池)呢個我就覺得好抵玩(當日基本上係我哋包場)
另外森林家族餐廳同禮品屋必去,食嘢打卡都抵! 🍱🍧🍰

要行入啲先見到呢條森林隧道,經過之後就會入到去森林家族公園。
就係呢個啦!三個人玩一次要60幾蚊港幣!
啲小動物好可愛呀!靚位影相
森林家族餐廳,乾淨,入面嘅擺設好靚㗎!Set menu: 大人¥1600,小學生以下¥1000,嬰幼兒不必一定要叫餐。
森林家族間屋呀!

 

**********************************************************************************************************

Day 3)  Marinoa City Fukuoka行utlet

呢日check out之後,就喺博多區周邊行下! 我哋經過麵包超人館🍞,但因為想趁著好天氣盡量安排戶外活動,🌞所以我哋就無入去!
嗰個位置附近有一間「一蘭」嘅總店(當日經過係唔使排隊㗎)如果想食嘅,我建議喺呢邊食,因為喺旅遊區天神嗰邊嘅「一蘭」係好多人排隊!
之後下午大部分嘅時間我哋都喺Outlet 渡過!去咗Marinoa City Fukuoka,我覺得行outlet有時真係要睇季節⋯⋯九月頭嘅天氣仲係好熱,但好多店舖都開始賣秋裝⋯⋯🥵🥵熱辣辣真係試唔到上身⋯⋯(有啲都幾靚㗎,不過唔啱時候買囉)
網址參考: https://www.marinoacity.com/sp/chinese-tra/

店舖必睇推介:
👉🏻Babies R Us(超級大間,好多玩具俾小朋友試玩,一啲日版玩具係香港無㗎)
👉🏻大型運動店(喜歡睇/買 同運動相關嘅嘢一定要行吓)
👉🏻2/F 機舖:有夾公仔,同埋推寶石嘅機,感覺上呢間好似比較容易夾到/推到禮品(有相)推甜品機啲甜品好靚㗎! 
👉🏻有2個小朋友放電嘅館(呢兩個嘅名我都唔記得咗啦,如果有興趣可以上網睇下先,印象中好似一個係玩繩索飛行之類:比較適合歲數大啲嘅小朋友,另一個喺商場內另一邊,有沙池同活動區(我哋行到去嗰邊嘅時候都已經差唔多閂門,無得入)

😍😍😍晚餐來了😍😍😍🥩🥗🍰🍧🍮🥫
係!可能我哋好後知後覺⋯⋯
不過第一次食「onyasai溫野菜Shabu Shabu 」真係好好食⋯⋯個「佐賀A5黑毛和牛」🥩真係好似入口即溶咁⋯⋯座位上私隱度又高(有房)六歲以下小朋友任飲任食完全免費⋯⋯呢一晚食完我哋返香港之前都有encore再食過!😋叫咗2個大人任食任飲都係$5xxx)和牛都係任食㗎)
(當然啦而家我知道原來香港都有嘅🙄,但我相信嗰邊啲肉係好食啲嘅⋯⋯一定係)
跟住落嚟嘅行程就遠離繁囂⋯⋯去吓郊外

呢間就係一蘭總店啦
Marinoa City Fukuoka Outlet
去到日本,爸爸最開心嘅就係佢哋嘅運動店好大間⋯仲要有高爾夫球專門店⋯⋯爸爸一枝箭衝入去,小豆入波呀,睇佢幾開心!
就係呢啲甜品喇!推甜品機好易中⋯⋯小豆自己都推到⋯⋯有時一跌係幾個添!
爸爸: 我決定送兩杯啤酒俾你飲🤣🤣

**********************************************************************************************************

Day 4)  由布院浸溫泉

一早起身check out之後就去返天神區行吓,最重要就係食返個「一蘭」拉麵! 🍜不過喺市中心呢間,就算未到午市都已經要排少少隊,等咗10分鐘左右先有位!入門口有部自動販賣機去order食物,所以坐低好快就有得食!值得一提嘅係,冇諗到「一蘭」地方細細,竟然有BB high chair ,可以唔冼抱住食!😲👍🏻
之後就開車出發去由布院啦!(又名湯布院)由於由布院係鄉郊地方,商店多數5pm 關門,餐廳就會夜d!
👉🏻由布院必食推介:🤤B-speak卷蛋Swiss roll ! 個蛋糕軟綿綿,奶油好香好creamy……當日我哋去到已經差唔多4pm……(好多人表示要預訂先買到,因為好快賣晒)但我哋無預訂好彩都買到⋯⋯真係點都要試下!😋
湯之坪商店街: 好有靈氣嘅街道,雖然都有唔少旅客,但感覺上呢度係好平靜,吸口空氣都零舍清甜!🙆🏻‍♀️🙆🏻‍♀️
👉🏻晚餐: 我哋揀咗一間日本家庭式餐廳,stone grill 和牛略嫌唔夠喉,但肉質真係好正!
👉🏻住宿: 我哋住嘅溫泉旅館:古都之花心。我訂嘅時候又係non peak , $8xx 一晚⋯⋯覺得個價錢都好合理!
呢一晚一家人浸完溫泉,圍埋一齊食件swiss roll,好簡單;卻是一件美事! 👨‍👩‍👧‍👦💑

一蘭食麵自閉位,後面竟然可以擺放到BB high chair,仲要有育嬰室,好讚!
湯之坪商店街: 呢度環境好靚好清靜⋯⋯感覺上真係好似去咗龍貓嘅樹林咁!
我哋冇選擇喺溫泉旅館食,搵到呢一間家庭式小店食石板燒和牛⋯⋯基本上包場咁⋯⋯好有日式味道,和牛好味!
我哋呢間旅店有好幾個溫泉位,家庭式溫泉唔使同人共用㗎!冇人用就可鎖上門自己一家人用!我哋行出自己間房轉個彎就係其中一個小溫泉所在地!基本上佢啲溫泉全部都唔係好大,亦無景觀,但私隱度好!
我哋住呢間旅館:古都之花心!適合自駕遊,有停車位,係車路入口有少少難搵!
返到旅館齊齊坐定定食B-speak swiss roll ! 發個夢都甜啲!   

**********************************************************************************************************

Day 5)大分Sanrio Harmonyland

行程嚟到第五日,因為由布院係一個好清靜嘅鄉郊地方,所以先一晚我哋好早瞓,第二朝一早就去埋金麟湖!呢個湖係當地好出名嘅旅遊景點,風景宜人,好值得一遊!

👉🏻推介:由布院金鱗湖:周邊仲有好多茶屋同小店一片綠油油,值得遊覽!☘️🌳🍀🍁🍂🌾

之後就出發去大分嘅Sanrio Harmonyland ! 由布院出發自駕車程大約40分鐘!
喺東京嘅🦄Sanrio Puroland(又名Hello Kitty land)好多人都去過⋯⋯不過呢個Harmonyland好唔同,因為佢分咗室內室外兩個區域⋯⋯而且最重要一點就係*唔.使.排·隊*!
喜歡little twin stars嘅我一去到簡直係失控狀態⋯⋯係咁講「嘩嘩嘩,好得意好靚呀」🤤🤤

👉🏻Harmonyland 必玩:有架小火車坐到山下,可以睇晒全個山景,嗰邊仲有一個室內遊覽船,啲公仔好可愛,小朋友都睇得好開心!
👉🏻室外遊玩區,整個區域都好多設施適合幼兒,可以合家歡齊齊玩!
👉🏻室外劇場:一定要睇,同卡通人物一齊唱歌跳舞小朋友睇到手舞足蹈好興奮!
👉🏻一入場記得問定有冇指定時間同卡通人物影相,不過呢個場內啲卡通人物就不定時轉換,我好好彩,當日有little twin stars photo time ! ✌🏻😍

當日去完樂園就直接返福岡市,車程差唔多2個鐘,👉🏻入住公寓Apartment 又係值得推介

SG Residence Inn Hakata
我book時HK$5xx左右,乾淨整潔又新,抵住!但係呢類都係要遲check in(5pm)早check out (10am)較適合自駕遊!
之後一日嘅夜晚就要返香港喇⋯⋯仲有啲花絮相容後分享!

 

 

金鱗湖:溫泉水流入湖中,水質清澈乾淨!
坐定定等睇劇場,大家可以帶定啲輕便嘅坐墊去席地而坐!幾架車分別載着唔同卡通人物⋯⋯
到Kiki合照時間
今期好多限定食物都係以隻兔仔為主,雪糕時間!
房內環境,有兩張雙人床,一家四口夠晒!同樣都有小廚房,一應俱全。

 

  • Facebook Error: Please check the details entered.
  • Follow588Followers
  • YouTube Error: Please check the details entered.

Zeen is a next generation WordPress theme. It’s powerful, beautifully designed and comes with everything you need to engage your visitors and increase conversions.