天熱最宜學游水 —— 夏天一到，又係游泳嘅季節，身邊媽媽朋友問，究竟小朋友幾多歲開始學游水最適合？
適合學游水的年齡
不少家長會讓一至三歲嘅寶寶參加游泳班，我個人認為呢個階段參加泳班能讓寶寶早點適應及熟悉水性，培養佢哋對游水嘅興趣及學習基本水中求生技能，但如果要學習泳式，游泳教練一般都會建議四至五歲開始學比較適合，因為呢個年紀嘅小朋友肢體發展較能平衡協調，容易掌握游泳技巧及水上生存技能，例如漂浮、踩水及游到特定的目的地。
小朋友游水必須有成人陪同
根據不同國家統計，遇溺是兒童意外死亡最常見原因之一，所以家長認為游水除咗令孩子心肺健康，提高身體柔韌性，增強耐力，改善平衡和姿勢，最重要係可以預防遇溺。
不論海灘或泳池，水位深或淺都有機會遇溺，而且遇溺可以發生得好快，可以係幾秒內發生嘅事，作為一個事事謹慎嘅媽媽，當兩個囝囝年紀還細嘅時候我帶佢哋上游泳班，雖然在場有救生員當值及教練在旁，但我都會坐喺泳池邊視線範圍見到囝囝嘅位置，如果同佢哋一齊落水玩就必定企喺佢哋旁邊，當佢哋潛入水我會不時進入水𥚃留意住佢哋。
當年朋友認為我過份緊張，但畢竟囝囝仲細，雖然已學識游水，但能夠令佢哋玩得暢快，我又放心，都係謹慎啲好！我仲曾經諗過自己是否需要報讀急救課程，學埋心肺復甦法以作不時之需！
——————
Sea Sea Mama —— 兩子之母，喜愛分享自己有笑有淚、有血有汗嘅「湊仔經」同「煮婦經」，交流生活點滴，講生活、講健康、講養生。
想知更多熱話，請按【城中熱話】
