聖經有說「教養孩童，使他走當行的道，就是到老他也不偏離」，但相信這只是希望父母灌輸子女正確價值觀、指引子女正確大方向，而非拖住仔女的手行父母想行的路吧！
上周末去茶餐廳打躉，等接興趣班放學，前面張枱坐了4名50+男女，不過多數由一名女士solo講解她將兒子由「讀唔到書」栽培到學士畢業到考到政府工、洗咗好多血汗錢嘅血淚史：
女士話「生仔點會唔知仔心肝」，一早就知佢「唔係讀書嘅材料」，於是兒子一上中四就安排佢狂補中英文，因為DSE中英文唔合格就「邊度都唔洗去」，咁又真係如她所料，兒子DSE中英文合格但其他科「唔好提」，於是安排佢去讀樹藝管理證書課程（因為那幾年打風塌樹嚴重，她推測依行有得發展），讀2年合格就可以轉讀degree，奈何兒子肥咗1科，於是停1年考埋那科合格，再讀多2年終於degree畢業，仲考到政府工，希望佢累積幾年工作經驗，再考埋做認可樹藝師，咁佢就安樂哂！
聽完，因為全程只得母親角度，完全唔知她的兒子喜不喜歡讀這科、做這行，只感覺到這兒子真的好「聽話孝順」，肯依照母親所說的順住做！雖說大部份阿媽都唔會點條黑路畀仔女⋯⋯
想當年我阿媽都叫我學好琴大個去教琴就唔駛每朝咁早起身返工！嚇到我考咗7級就停學！大學畢業後阿媽又叫我去教書/考公務員，第時有退休金/長糧就唔駛太愁，我卻走咗去做雜誌編輯，但坦白講，我係無悔我嘅選擇嘅！
所以，即使阿媽叫你行嗰條係康莊大道，做仔女嘅都未必會聽；何況，我自己依家做咗人阿媽，我真係無信心大大聲講「生仔點會唔知仔心肝」？！阿媽真係會完全通透了解仔女嘅才能、意願？又會挑通眼眉准確預測時勢？即係預測到10-15年後的產業結構、職業結構、科技發展及社會問題等？
又或者，仔女想行條崎嶇啲、迂迴啲但佢認為有趣啲嘅路，我逼佢行條易行直路又有乜意思呢？！畢竟，要多外出走走、多看看這個世界，才能讓自己有更多的遇見、更了解自己，俗語說「沒有觀世界，何來世界觀」是對的。
事實上，身邊不時見到有父母自認一份職業對孩子好，迫孩子按自己心意而行，孩子卻找不到當中的樂趣，後來喪失了人生的動力熱情，最後中途放棄。
在此強調，我不是說那名女士逼迫兒子，因為樹藝師這職業可能是兩母子共同商議而且是兒子的愛好！
我記下這件事，純粹想提醒自己，第時仔女想讀乜做乜，支持就好，意見若他們想我畀，當然會畀，唔想我畀，就默默支持吧！
之前睇過兩本教養書，其中2句深得我心：
- 「無論父母說的道理多麼的正確，如果孩子不肯聽的話，那就毫無意義。因此，首先要注意的是父母的態度，不是去巴結孩子，而是對孩子有同理心，讓孩子覺得父母了解他們，自己敞開心門。」
─ 《你那麼大聲幹嘛啦！？》親野智可等
2. 「你能送給自己與孩子最貴重的禮物，就是讓孩子從容成長。你亦必須對自己成為稱職父母的過程給予耐心。」
─ 《如何叫得動青春期男孩》Adam Price