龍尾泳灘半天遊｜天朗氣清嘅日子，當然要去沙灘堆沙玩水。連續落咗好多日雨，終於都出太陽，藍天白雲，雪梨媽就決定趁住好天氣帶埋雪梨B與朋友仔一齊去沙灘玩！今次第一次去人造沙灘：龍尾泳灘！
龍尾泳灘位於新界大埔汀角路，鄰近大美督及船灣淡水湖，泳灘全場約200米，係香港首個由政府興建的人工泳灘。
雖然是人造沙灘，但一樣有貝殼在沙堆內，啲沙粒特別細，比起平時既公眾泳灘少好多碎石玻璃，海中未見有垃圾在飄浮，仲有很多細細隻嘅海星喺淺水區，好多小朋友都喺嗰度研究海星，啱哂小朋友去玩，可以盡情咁跑跑跳跳！
溫馨提示！！
記緊一定要將海星放回海灘，不可影響生態環境！
今次雪梨B仲約埋個以前幼稚園識既同學仔一齊去玩，有齊堆沙工具，係沙灘上面砌城堡，玩迷你沙灘排球！雪梨媽覺得最滿意就係由停車場行去沙灘，只不過係幾步路，又有 $20／小時的指定停車位， 更衣室及長長的觀景台，十分現代感，想買飲品小食補充體力亦方便！
沙灘鄰近大美督，旁邊就有單車徑，不時都有人踩住單車經過，特別有種忙裏偷閒既感覺，就好像去咗台灣度假咁！
去玩既朋友一定要等到黃昏時分，千祈唔好錯過呢個打卡點既重點，係海邊睇日落真係好靚，背景有白色的燈塔，長長的單車徑，真係好有韓feel，十足十係韓劇入面會見到既場景！泳灘設施都新淨，真係值得去到訪下。但係大家要小心，有時泳灘有大量海膽係潮退時被沖上岸，唔好整襯呀！
龍尾泳灘懶人資訊包
地址：大埔汀角路168號
自備物品：
防曬用品、蚊怕水、風扇仔、飲用水、乾糧
交通工具：
由大埔墟站乘搭75K巴士，在蘆慈田或龍尾村站落車，車程約40分鐘，車費$6.2；或可在大埔墟站乘搭20C小巴，在蘆慈田或龍尾村站落車，車程約30分鐘，車費$7.7。亦可選擇自駕，泳灘有停車位可以停泊。
附近景點：
大美督家樂徑 – 可以一家大細一齊享受遠足的樂趣
單車路線：大埔海濱公園 → 大埔工業邨 → 大美督堤壩，全長約九公里。
附近美食：
Bulldog Hotdog – 大埔廣福道60-62號地下C舖，只限外賣，皇牌熱狗，招牌熱狗
Meraki – 大埔大美督村50M地舖，all day breakfast
____________________
撰文：雪梨媽 （Facebook : 雪梨家族吃喝玩樂Fun ）
想知更多好去處，請按【親子好去處】