好多行山人士都會把握星期六日假期去萬宜水庫東壩欣賞六角形岩柱。今次雪梨爸、雪梨媽帶埋雪梨B一齊去萬宜水庫東壩，途經浪茄灣，再登上西灣山。
雪梨家族喺東壩影相之後，沿麥理浩徑第一段行去浪茄灣。浪茄灣海水長期都係天藍色，被譽為香港最美麗嘅海灘之一，四周被山峰及海岬包圍，喺路程途中雪梨B好期待親眼見到水清沙幼嘅浪茄灣。
喺浪茄灣稍作休息之後，雪梨家族繼續沿麥理浩徑第二段前往西灣嘅路程。隨後到達西灣山山腳，就要行一段辛苦少少嘅上山路程，幸好中途可以喺涼亭休息一陣。最終上到西灣山山頂之後，雪梨家族可以欣賞大浪西灣同鹹田灣嘅景色。
浪茄灣行山資訊懶人包
難度：三粒星星（五粒星星最高）
適合年齡: 8歲或以上人仕
交通工具：
前往萬宜水庫東壩：
平日：從港鐵鑽石山站C2出口搭乘92號巴士，或從港鐵坑口站B1出口搭乘101M號專線小巴至西貢市中心。到達西貢市中心後，搭乘計程車至萬宜水庫東壩。
星期六、星期日及公眾假期：從西貢市中心乘搭94號或96R巴士往北潭涌，然後從北潭涌乘搭專線小巴9A前往萬宜水庫東壩。
從西灣亭離開：
乘搭居民巴士NR29線或計程車前往西貢市中心。
附近美食：（西貢市中心）
KACHIMUSHI：芝士拼盤、黑松露蟹肉沾醬配吐司、烤比爾芝士配吐司
西貢茶記：豬扒公仔麵、香煎雞扒米線、生炸雞中翼通粉
附近景點：
北潭涌家樂徑、西貢千島湖
撰文：雪梨媽 （Facebook : 雪梨家族吃喝玩樂Fun ）
想知更多好去處，請按【親子好去處】