打風季節又嚟啦！3個必裝天氣App 即時睇颱風路徑 規劃親子日程更安心（附下載連結）
打風季節一到，最頭痛就係「聽日返唔返學？返唔返工？」尤其有小朋友嘅家庭，想提前安排托兒、停課通知、甚至買齊食水乾糧，都要靠準確天氣資訊。
最近颱風消息頻傳，想緊貼最新風暴動態，與其成日refresh新聞，不如裝定幾個實用天氣App，自己睇實颱風路徑同走向。今日分享媽就同大家推介3個打風必備App——「我的天文台」、「Windy」同「Clime」，幫你隨時掌握最新消息，規劃日程更輕鬆！
【1】我的天文台：官方最準 家長首選
「我的天文台」係香港天文台官方App，更新速度最快、準確度最高，絕對係打風期間必裝。
App入面有齊最新風暴消息、颱風路徑圖，地圖可以放大，點擊顏色點或者風眼，就會即時顯示時間、位置同最高持續風速。就算唔識睇天氣圖都冇問題，按下「i」標記，就有文字簡單說明。下方仲有固定範圍地圖同路徑概率預測圖，大概估計到颱風會點走。
小貼士： 有小朋友嘅家長，記得開通知功能，天文台一有新警告就會即時推送，唔使成日擔心錯過停課或掛風球消息。
【2】Windy.com：圖像超清晰 睇全球天氣一流
Windy.com 係全球天氣監測工具，用最準確嘅模型預測，天氣雷達圖特別好用。介面以圖像為主（只支援英文），但操作簡單，一開App就見到位置、即時氣溫同預測。
想睇颱風？按下「Tropical Cyclone」就可以睇到簡單颱風資訊。下方有播放鍵，可以預測即時至5天後嘅颱風走向，非常直觀。右邊選項欄仲有雷達圖、衛星圖、機場資料、網路攝影機等，免費版已經夠用，值得下載。
小貼士： 想知道週末親子活動會唔會受雨影響，用Windy睇雨量同風速預測，規劃outdoor定indoor更準確！
【3】Clime: 氣象雷達：排行榜第3 即時雷達超實用
Clime 喺天氣App排行榜經常位居前列，設有即時天氣雷達、14日風同天氣預測、24小時雨勢預測等功能。主頁直接顯示風暴資訊，包括距離、強度、方向，仲有時間同位置預測。按下地圖就可以切換雷達、精細降雨預測等不同視圖。
免費版功能有限，付費版設有限時試用，不過基本颱風追蹤已經夠日常使用。
小貼士： 打風期間想知「而家落緊雨未？」，Clime嘅即時雷達圖最方便，一目了然。
打風季節最緊要就係資訊夠快、夠準。有呢3個App在手，無論係想知聽日使唔使返學、定係規劃屋企備貨，都可以自己掌握主動權。
家長記住，除咗睇App，都要留意天文台官方網站同新聞，保持警惕。有咩好用天氣App推薦？歡迎留言同其他Mame分享呀！