老火燉湯以其獨特的烹調方式和豐富的營養價值，成為人們追求健康和美味的首選。以下10款中式老火湯譜融合了各式豐富食材與營養的精髓，讓您能在家中輕鬆烹調出滋補養顏的美味佳餚，每一道湯品都能給予身心以滋潤和養顏功效的同時，為全家人帶來健康與幸福。
中式老火靚湯譜推介1. 青邊鮑魚花膠濃雞湯 
自家煲中式老火湯，最真材實料！要煲到濃雞湯，多數都係攪碎雞件或者炒雞肉灒熱水！今次偷懶，加入雞腳增加膠質，中途就咁用湯勺分開雞肉再中大火煮，能令肌肉纖維和湯汁混合，超重骨膠原，啖啖都是精華，非常濃郁黏口！
貼士：發花膠秘訣好簡單，先蒸再浸水，次次都好成功。
材料：雞 1隻斬件、青邊鮑魚 1隻300g、花膠 2塊、瑤柱 15粒浸軟、瘦肉 400g、雞腳 8隻、金華火腿 80g、淮山 3片、水 2800ml
做法：
- 浸發花膠：花膠不用清洗，直接放上大碟，淋上1茶匙米酒蒸約8分鐘；放入清潔無油的容器，用清水放雪櫃浸發3晚，每天更換清水一次，放冰格保存。
- 處理青邊鮑魚：刷洗外圍污垢，去除內臟和鮑魚嘴。
- 肉類汆水：雞件、雞腳、瘦肉和金華火腿加入清水，中小火煮至滾2分鐘，盛起沖洗。
- 壓力煲： 大鍋加入所有材料，注入清水，中火煮沸後加壓煮1小時；用湯勺分開雞肉，加壓煮30分鐘。
- 其他鍋具：大鍋加入所有材料，注入清水，中火煮沸後合蓋小火煮2小時；用湯勺分開雞肉至散開，半掩蓋中火煮30分鐘，中途要看火，如果太少水可以加滾水；開蓋中大火煮5-10分鐘至湯呈淡黄色。
- 加入花膠，合蓋小火煮30分鐘，吸油紙放上隔篩，湯汁過篩即成。
中式老火靚湯譜推介2. 蜜瓜螺頭爵士湯
爵士湯係西苑酒家名菜！第一次飲嗰陣覺得好新奇，冇諗過蜜瓜可以用來煲湯。蜜瓜配上螺頭，味道清甜滋潤！另外加埋花膠同雞腳，充滿骨膠原。餐廳版本會加老雞，並會將蜜瓜打成蓉。這個簡化版只落了瘦肉，味道都好好！而且湯煲耐咗，蜜瓜都變得軟淋，攪下就會溶入湯中。
材料：蜜瓜 1個、雞腳 8隻、瘦肉 400g、花膠 2塊、乾螺頭 4塊、瑤柱 15粒、無花果/ 椰棗 5粒、沙蔘 15g、玉竹/ 玉竹頭 15g、陳皮 1片、水 1800ml
做法：
- 浸發花膠：花膠不用清洗，直接放上大碟，淋上1茶匙米酒，視乎花膠厚度蒸約8分鐘。
- 花膠放入清潔無油的容器，用清水放雪櫃浸發3晚，期間每天換水一次，瀝乾水後放冰格保存。
- 預備海味：乾螺頭和瑤柱放入熱水30分鐘浸軟，乾螺頭去腸；果皮用溫水浸軟，用刀刮走內囊。
- 肉類汆水：大鍋放入雞腳和瘦肉，注入清水，小火煮至沸騰後撈起沖洗。
- 除花膠外，全部材料放入大鍋，煮沸後合蓋小火煮2小時。
- 加入花膠，煮沸後合蓋小火煮30分鐘即成。
中式老火靚湯譜推介3. 虎乳靈芝羊肚菌栗子烏雞湯
虎乳靈芝又叫虎奶菌/老虎奶/白靈芝！其實同老虎牛奶靈芝完全無關，只是一種真菌類。因虎乳靈芝磨成粉之後加水味道似牛奶而得名，具有益氣補肺化痰止咳功效，還可以增強抵抗力。上網翻查虎乳靈芝對中咗covid有後遺症或是成日咳都好有幫助，1包4両大約$100，可以分到幾次煲湯用，既相宜又別具養生之效！
材料：烏雞 1隻、虎乳靈芝 30g、羊肚菌 6粒、姫松茸 30g、紅蘿蔔 1條、粟米 1條、栗子 12粒、紅棗 2粒去核切半、無花果 4粒切半、准山 2片、水 1800ml、杞子 1湯匙
做法 ：
- 浸泡菇菌：羊肚菌、姫松茸和虎乳靈芝沖洗沙石，室溫水浸泡30分鐘，浸菇水過濾備用。
- 肉類汆水：大鍋放入雞件，注入清水，小火煮至沸騰後撈起沖洗。
- 除杞子外，全部材料放入大鍋，煮沸後合蓋小火煮2小時。
- 放入杞子，煮沸後合蓋小火煮30分鐘，下鹽調味即成。
中式老火靚湯譜推介4. 蟲草花蘋果雪耳海底椰湯
蟲草花含有豐富蛋白質同氨基酸，有助提高免疫力。這個湯加入蘋果特別清甜，甜甜地大人細路都啱飲，另加埋雪耳同海底椰，有美顏滋陰潤肺功效。
材料(4-6碗)：豬肉 300g、蟲草花 30g、蘋果 2個、紅蘿蔔 1條切件、粟米 1條切件、鮮海底椰 4-6粒切件、無花果 5粒、雪耳 1塊、杞子 2湯匙、水 共1800ml (連浸蟲草花水)
做法：
- 處理食材：蟲草花沖洗，用室溫水浸泡30分鐘，浸蟲草花水過濾備用；雪耳放入清水浸軟。
- 肉類汆水：大鍋放入瘦肉，注入清水，小火煮至沸騰後撈起沖洗。
- 除杞子外，全部材料放入大鍋，煮沸後合蓋小火煮1.5小時。
- 放入杞子，煮沸後合蓋小火煮30分鐘即成。
中式老火靚湯譜推介5. 五指毛桃薏米去濕湯
呢排濕氣好重成日覺得好攰，推介煲五指毛桃湯。五指毛桃有健脾去濕，潤肺益氣功效；外表似樹枝，用來煲湯帶有椰子香氣，飲落去好清甜，今次加埋薏米，加強阹濕功效。不想落豬肉，加腰果即可變成素湯。
貼士：五指毛桃建議買啡黃色粗身果種，好過一紥幼身果啲，聞落去有淡淡椰子味！如果有酸味可能用琉璜熏過，建議大家不要買。
材料：五指毛桃 50g、瘦肉 400g (或可用腰果代替)、粟米 2條切件、紅蘿蔔 1條去皮切件、生熟薏米 30g、百合 20g、蓮子 20g、茨實 20g、蜜棗 5粒、紅棗 2粒去核、杞子 1湯匙、水 1800ml
做法：
- 五指毛桃沖洗表面污垢，切段；浸水15分鐘。
- 肉類汆水：大鍋放入瘦肉，注入清水，小火煮至沸騰後撈起沖洗。
- 除杞子和紅棗外，全部材料放入大鍋，煮沸後合蓋小火煮1.5小時；加入杞子和紅棗，繼續小火煮30分鐘即成。
中式老火靚湯譜推介6. 鮮椰子淮山栗子燉烏雞湯
今之用成個椰子殼當湯盅燉，所以開咗頂嘅硬殼，再倒出椰子水，另外加了新鮮淮山，健脾又促進消化！記得處理淮山要戴手套，如果唔係隻手會好痕！由於一個大椰子容量只有約600ml，加埋湯料直接燉會得返好少湯，所以先用椰子水加清水煲湯，再放一部分入椰子燉！吸收哂椰子香味超香濃，其餘得湯就直接盛起飲用。
材料：烏雞 1隻、鮮椰子 1個、鮮椰子水+清水 共1800ml、薑 4片、栗子 12粒、新鮮淮山 半條去皮、無花果 2粒切半、紅棗 2粒切半去核、杞子 1湯匙
做法：
- 處理食材： 鮮椰子可請店主幫忙開殼；新鮮淮山亦可請店主幫忙去皮(如自己處理必須戴手套)。
- 肉類汆水：大鍋放入烏雞和薑片，注入清水，小火煮至沸騰後撈起沖洗。
- 除杞子外，全部材料放入大鍋，加入椰子水和清水，煮沸後合蓋小火煮1.5小時；加入杞子後再煮30分鐘；下鹽調味，用吸油紙去油。
4. 將湯倒入鮮椰子(容量約600ml)，蒸30-45分鐘即成 。
中式老火靚湯譜推介7. 清潤木瓜栗子螺片雞腳湯
天氣開始轉涼，皮膚喉嚨又乾，要這個湯滿滿骨膠原，潤肺又健脾，味道仲好清甜。見雪櫃有螺片，加埋入去煲湯，不用去腸方便過用螺頭；螺片有滋陰養胃功效，特別啱經常捱夜人士補吓！
材料：青木瓜 1個去皮切件、栗子 12粒、豬筒骨 1條約600g斬件、雞腳 8隻、螺片 2塊、紅蘿蔔 1條去皮切件、雪耳 1個、玉竹 15g、花生 70g、眉豆 60g、無花果 3粒、果皮 1小塊去囊、水 2000ml
做法：
- 處理食材： 螺片和雪耳用室溫水浸泡30分鐘。
- 肉類汆水：大鍋放入雞腳和豬筒骨，注入清水，小火煮至沸騰後撈起沖洗。
- 全部材料放入大鍋，煮沸後合蓋小火煮2小時，下鹽調味即成。
中式老火靚湯譜推介8. 海星海底椰雪梨潤肺湯
這是非常清甜滋潤的湯水，海星有化痰止咳、消炎潤肺功效，飲完喉嚨會好舒服。乾海星好易處理，用暖水浸軟，再除去黑色的內臟就OK，清咗內臟就唔會腥！配上海底椰同雪梨乾更加滋潤，建議用雪梨乾，用新鮮雪梨會比較寒涼；另外加埋蘿蔔粟米，味道更加清甜！
材料：乾海星 3隻、粟米 1條切件、紅蘿蔔 1條切件、瘦肉 300g、海底椰 60g、雪梨乾 5片、蜜棗 3粒、南北杏 1湯匙、准山 2片、果皮 1小片刮囊、水 2000ml
做法：
- 處理食材：海星用暖水浸1小時，剪開底部去除內臟。
- 大鍋放入瘦肉，注入清水，小火煮至沸騰後撈起沖洗。
- 全部材料放入大鍋，煮沸後合蓋小火煮2小時即成。
中式老火靚湯譜推介9. 金銀菜陳腎豬骨湯
見呢排街市大白菜好靚，陳腎就係出自 @yuewohopkee ，即刻買返去煲湯。這個金銀菜陳腎湯好啱入秋飲，清熱潤肺、健脾開胃作用。有時出街食濟咗，飲呢個湯特別舒服！
材料(2-4人份)：豬骨 450g、水 1800ml、大白菜 4棵、白菜乾 1扎、紅蘿蔔 1條切件、粟米 1條切段、陳腎 2個、南北杏 1湯匙、蜜棗/無花果/ 椰棗 3粒、陳皮 1片
做法：
- 白菜乾浸水1小時去沙，注意清洗莖部；果皮用溫水浸軟，用刀刮走內囊。
- 肉類汆水：大鍋放入瘦肉和陳腎，注入清水，小火煮至沸騰後撈起沖洗。
- 所有材料清洗乾淨，放入大鍋大火煲滾後，小火煮2小時即成。
中式老火靚湯譜推介10. 蟲草花姫松茸栗子雞湯
秋天最啱食栗子，自從上年試過桂林錐栗，而家煮餸煲湯一定用佢，通常街市買返嚟已經去咗硬殻，所以番屋企淨係去皮就ok。同之前煮奶白雞湯唔同，今次只需將雞肉汆水，加埋其他材料直接煲就完成，放工都煲到。這個湯菇味濃郁超香，而且姬松茸同蟲草花含豐富營養，補肝益肺，降血壓降膽固醇，轉季飲特別適合。
貼士：本來怕自己處理栗子好麻煩，原來好簡單，秘訣就係趁熱快手去皮。桂林錐栗真係比板栗/真空包裝現成栗子好食好多，因為未去皮，栗子嘅香味同水份冇咁易流失！栗味香濃，炆煮後更粉甜，推介大家一試！
材料：雞 1隻、栗子 半斤、姬松茸 50g、蟲草花 40g、玉竹 25g、淮山 3片、紅棗 4粒去核切半、杞子 2湯匙、水 共1800ml (連浸菇水)
做法:
- 浸泡菇菌： 姫松茸/蟲草花沖洗，用室溫水浸泡30分鐘，浸菇水過濾備用。
- 處理栗子：大鍋煮滾水，放入栗子煮2分鐘，再合蓋焗5分鐘，趁熱去皮。
- 肉類汆水：大鍋放入雞件，注入清水，小火煮至沸騰後撈起沖洗。
- 除杞子外，全部材料放入大鍋，煮沸後合蓋小火煮2小時(可預留1/3份量栗子最後30分鐘才加入)。
- 放入杞子，煮沸後合蓋小火煮30分鐘；下鹽調味即成。
圖文授權：IG@kiuu922
想尋找更多煮食新意請看【自煮料理】
